160 қазақстандық бала «Қамқорлық» акциясы аясында 600 млн теңге әлеуметтік көмекке ие болды

3 Наурыз, 2015 10:08

Қазақстан Республикасы Білім және ғылым министрлігінің Балалардың құқықтарын қорғау комитеті «Қамқорлық» дәстүрлі республикалық акциясын өткізді.

Білім және ғылым министрлігі хабарлағандай, акцияның мақсаты - әлеуметтік көмек алуға құқығы бар аз қамтылған, көп балалы, тұрмысы қолайсыз отбасылардың балаларына, жетім балалар мен ата-анасының қамқорлығынсыз қалған балаларға және басқа санаттағы балаларға әлеуметтік көмек көрсету, оқумен қамтылмаған мектеп жасындағы балаларды анықтау және есепке алу, сондай-ақ әлеуметтік себептер (киімдерінің, аяқ киімдерінің, мектеп құралдарының жоқтығы) бойынша балалардың мектепке бармауының алдын алу.

Ағымдағы жылда акция барысында аз қамтылған отбасылар ішінен 160 мыңға жуық балаға 600 млн. теңге көлемінде, соның ішіде 100 мыңға жуық балаға демеушілер арқылы 250 млн. теңге көлемінде көмек көрсетілді.

Акцияға мемлекеттік қызметшілер, республиканың барлық өңіріндегі әкімдіктер, кәсіпкерлер, әртүрлі нысан меншігіндегі ұйымдар мен өндірістер белсене араласты.

Акция барысында білім берумен қамтылмаған балалардың (білім берумен қамтылмаған 66 бала анықталды, 29 бала мектепке қайтарылды) пайда болуы бойынша үйлерді (пәтерлерді) тексеру жүргізілді.

Барлық жаңалықтар