Ақмолалық оқушылар Ғарыш байланысы республикалық орталығын аралады
2 Наурыз, 2015 20:23
Ақмола облысы Астрахань ауданының оқушылары «Ақкөл» ғарыш аппараты басқармасының жер бетіндегі кешенін аралады, деп хабарлады «Ақмола Медиа Орталығы».
«Ғарыш байланысы республикалық орталығын Астрахань ауданынан келген дарынды оқушылар аралады, олар облыстағы пәндер бойынша олимпиаданың жүлдегерлері мен қатысушылары, спорттық жарыстардың жас жеңімпаздары», - делінген хабарламада.
Кешеннің мамандары оқушыларды «KazSat» сериясы бойынша шыққан жерсеріктерін басқару жұмысымен таныстырды.
Бұдан басқа, кешеннің аумағында оқушылар ҚР ИДМ аэроғарыш комитетінің төрағасымен, Премьер-Министрдің авиация және ғарыш бойынша кеңесшісі, ұшқыш-ғарышкер Талғат Мұсабаевпен және Сидней Олимпиадасының чемпионы, Мәжіліс депутаты Ольга Шишигинамен кездесті.
