Сенат әлеуметтік-еңбек салаларындағы мемлекеттік қызметтерді автоматтандыру мен оңтайландыру мәселелеріне қатысты түзетулерді қабылдады

«Аталған өзгерістер халыққа қызмет көрсету орталықтары мен «Электронды Үкімет» порталына қандай да бір мемлекеттік қызмет түрлерін көрсету бойынша қайырылғанда альтернативті мүмкіндіктер жасауды қарастырып,  көрсетілетін мемлекеттік қызметтің нәтижелерін алу мерзімін қысқартып, сол қызметке ұсынылатын құжаттардың да санын кемітуді қарастырады»,-делінген Сенаттың әлеуметтік-мәдени даму комитетінің қорытындысында.

 Аталмыш комитет өкілдерінің мәліметтерінше, аталмыш заң жобасының мақсаты бизнес-үдерістерді оңтайландыру, ақпараттық жүйелер мен базаларды ықпалдастыру, электронды құжаттар мен электронды қолдарды сондай-ақ «Электронды Үкіметтің» қолдану аясын кеңейту арқылы  мемлекеттік қызмет көрсетудегі оңды өзгерістерді заң жүзінде бекіту болып табылады.

  «Заң жобасында сондай-ақ еліміздің қандай да бір мекемесінде немесе кәсіпорнында ұзақ жылдар бойы қызмет еткен жұмысшылар мен еңбеккерлердің атқарған істері мен олардың арасындағы ерекше көзге түскендерінің істерін лайықты бағалау мақсатында «Еңбек» орденінің орнына үш дәрежеге бөлінетін «Еңбек даңқы» мемлекеттік наградасы енгізіледі. Ал, «Еңбек даңқы» орденінің иегерлері «Қазақстанның еңбек ері» атағына ие болғандармен теңестіріледі»,-деді депутаттар.

Камила Амирова