Алматыда Қазақстан архитектурасы Фестивалі ашылды
Фестивальде ТМД елдер арасындағы посткеңестік кеңістікте жылдың ең үздік архитектуралық туындысын анықтау мақсатымен халықаралық архитекторлар кеңесі қауымдастық байқауы өтеді. Сонымен қатар, соңғы үш жылдағы архитектуралық туындыларды Республикалық байқау мен еліміздің Архитектура мектептеріндегі үздік дипломдық жұмыстар байқауын өткізу жоспарлануда.
Фестиваль аясында болашақ архитектор студенттер жұмысының да көрмесі ашылды.
Фестивальдің ашылу шарасына қала әкімі Ахметжан Есімов қатысты.
«Алматының қазіргі келбеті ондаған жылдардың жемісі. Қала құрылысында үлкен архитекторлар, дизайнерлер мен құрылысшылар қызмет етті», - деді қала әкімі.
Әкімнің айтуынша, соңғы 5 жыл ішінде қалада 5157 мың шаршы метр тұрғын үй салынып, 21 балабақша қолданысқа берілді. Сонымен қатар, 20 мектеп пен 18 денсаулық сақтау нысаны салынған.
