ИИДМБ: Жамбыл облысында 2015 жылы 700 жұмыс орнының ашылуымен 5 жоба жүзеге асырылады

«Индустриаландыру картасы аясында құны 22,8 млрд. теңгені құрайтын 6  жоба іске асырылып, мыңға жуық жаңа жұмыс орны құрылған. ҮИИД бағдарламасының алғашқы бес жылдығында құны 123 млрд. теңге болатын 33 жоба жүзеге асырылса, екінші бесжылдықта 26 инвестициялық жобаны іске асыру жоспарлануда», - деді облыс әкімі К.Көкрекбаев.  

Нәтижесінде 7 мыңға жуық жаңа жұмыс орны ашылады. «Бизнестің жол картасы-2020» бағдарламасы аясында 374 жобаға  қолдау көрсетілді. Олардың 32 пайызы аудандарда, қалғаны  Тараз қаласында орналасқан.

«Моноқалаларды дамыту бағдарламасы бойынша Жаңатас және Қаратау қалаларына өткен жылы 1,2 млрд. теңге бөлініп, қаражат көгалдандыру, жарықтандыру т.б жұмыстарға жұмсалды», - деді ол.

 «Қолжетімді баспана-2020» бағдарламасында да жүйелі жұмыстар жүргізілуде. Бағдарлама  аясында 258 мың шаршы метр баспана пайдалануға берілді. Биыл Тараз қаласындағы автобекет пен Сабалақов көшесінің аумағындағы 462 га жерге 14,15 шағынаудандардың құрылыс жұмыстары жүргізіледі.

Осыған дейін «Тұрғын үй коммуналдық шаруашылығын жаңғырту» бағдарламасы  шеңберінде 109 көпқабатты тұрғын үй жөнделсе, биыл 916 млн.теңгеге 44 көппәтерлі баспанаға жөндеу жұмыстары жүргізілмек.

«Ақ бұлақ» бағдарламасының аясында қазір аймақ тұрғындарының 60 пайызы орталықтандырылған су жүйесіне қосылған.
2014 жылы ауылшаруашылығы саласында 5,3 млрд.теңгеге 142 жоба іске асырылды.

Елбасының аграрлық-инновациялық кластер құру туралы тапсырмасына сәйкес, Шу ауданында  көкөніс кластерін ұйымдастыру жұмыстары қолға алынды.

Облыс әкімі өңірдегі білім және денсаулық саласына да жіті көңіл бөлініп келе жатқанына тоқталды. Мәселен, «Балапан» бағдарламасы бойынша  23 балабақша, 9 шағын орталық ашылып, 3 тен 6 жас аралығында мектепке дейінгі тәрбиемен қамтылғандардың үлесі 71 %-ға жеткен.