Астанада ШОБ нысандары барлық салық төлемдерінің 65 пайызын қамтамасыз етіп отыр

2014 жылы бұл көрсеткіш 420 миллиард теңгені құрады. Жалпы өңірлік өнімдегі оны үлесі 50 % құрады.

Елордада алғашқы Кәсіпкерлерге қызмет көрсету орталығы жұмыс істейді. Онда бизнесмендерге «бір терезе қағидаты» бойынша тегін түрде ақпараттық және кеңестік қолдау қызметтері көрсетіледі. 2014 жылы өздеріне қажетті кеңестерді алған тұтынушылар саны 4,5 мың адамды құрады.

Қала әкімдігінің ақпараты бойынша,  кәсіпкерлікті дамытуда жуырда Әкімдік пен қалалық кәсіпкерлер палатасының ортақ жұмыс жүргізуге байланысты қол жеткізген уағдаластығы да зор үлесін қосады. Қол қойылған тиісті келісім бойынша: шағын және орта кәсіпкерлікке арналған көпсалалы өндіріс кешенін; өңірлік сауда орталығын құру; Астанада бизнестің даму картасын әзірлеу және өзге де шаралар қарастырылады. Ағымдағы жылдың 10 ақпанында елордадағы шағын және орта бизнес үшін бизнес-ортаны жақсарту және қаржылай қолдау көрсету бағытында тағы бір қадам жасалды. Жеке кәсіпкерлікті қаржыландыру бойынша кезекті Бағдарлама іске қосылды. Осы мақсатта жергілікті бюджеттен 500 млн. теңге, «Даму» Қорынан 1 млрд. теңге бөлінді.

Ағымдағы жылы Әкімдік тарапынан елордада сауда-саттықтың заманауи үлгілерін енгізу және қызмет көрсету сапасын әлемдік деңгейге жеткізу жұмыстары басталды. Бұл нені білдіреді?

Бүгінгі таңда Астанада жедел тамақтану және алғашқы қызмет көрсету нысандарының орналасу кестесі жасалып, соған сәйкес 300 орын белгіленіп алынды. Олар ашық байқау негізінде әлеуметтік-кәсіпкерлік корпорациясы арқылы бизнесмендерге жалға берілетін болады.

Болашақта жүйесіз сауда-саттықты болдырмас үшін қоғамдық тамақтану мекемелеріне арналған рұқсат құжаттарын беру механизмі жасалуда. Ұсқынсыз әрі санитарлық талаптарға сәйкес келмейтін ескі сауда нысандары ыңғайлы әрі жеңіл конструкциялармен алмастырылады. Қалада қысы-жазы жылдам әрі дәмді тамақтануға, салқын немесе ыстық сусындар ішуге болатын жаңа павильондар пайда болады.