Қазақстан Ресейдің ерекше экономикалық аймақтарын зерделеуде
Сапардың мақсаты-ерекше экономикалық аймақтарды басқарудың орталықтандырылған жүйесін енгізу жөнінде тәжірибе алмасу, Қазақстан мен Дубна қаласындағы инновациялық аймақтарды дамыту. Сондай-ақ осы бағыттағы жұмыстарды әрі қарай тұрақты жетілдіріп отыру мақсатында ресейліктермен қарым-қатынас орнатып, олардың мүмкіндіктерімен танысу да сапар барысындағы негізгі шаралардың бірі болды.
А.Айдаровтың айтуынша, Қазақстан үшін ерекше экономикалық аймақтарды басқару компанияларын құру мен оның толық инфрақұрылымын қалыптастыру тәжірибесімен алмасудың маңызы зор. «Қазіргі таңда біздің алдымызға ерекше экономикалық аймақтарды басқарудың бірыңғай үйлестіру орталығын құру мәселесі қойылып отыр. Бұл ретте біз ресейлік әріптестеріміздің осы бағыттағы тәжірибелерін терең зерттейтіндігімізді айтқым келеді. Осы мақсатта біз бүгін ресейліктермен ортақ келісімге келіп, екіжақты ынтымақтастықта жұмыс істеу жөніндегі меморанддумға қол қойдық»,-деді А.Айдаров.
Сапар барысында А.Айдаров Дубнада ерекше экономикалық аймақтардың қалай дамып жатқандығымен және оның ерекшеліктерімен танысты. Сондай-ақ ол Қазақстан аймағындағы ерекше экономикалық аймақтарды қалай дамытуға болатындығын, ол үшін инвесторларға жер мен қуатты қалай бөліп беру қажеттігі жөніндегі жұмыстарды ресейліктердің тәжірибелері негізінде зерделеп қайтты.
