Астанада мемлекеттік этносаясатты іске асыру саласында кәсіби білімді арттыру бойынша семинар-тренинг өтуде
Академияда хабарлағандай, семинар жұмысына өңірлердің этномәдени және діни ұйымдарының басшылары, этносаралық және конфессияаралық қатынастар мәселелерімен айналысатын мемлекеттік қызметшілер, Қазақстан халқы Ассамблеясының өкілдері, Қазақстан Республикасы Президентінің жанындағы Мемлекеттік басқару академиясының, «Қоғамдық келісім» республикалық және өңірлік мекемелерінің өкілдері қатысуда.
Аталған семинардың мақсаты Қазақстан Республикасының Президенті – Елбасы Н. Ә. Назарбаевтың 2012 жылғы 14 желтоқсандағы «Қазақстан-2050» Стратегиясы: қалыптасқан мемлекеттің жаңа саяси бағыты» атты Қазақстан халқына Жолдауы және Қазақстан халқы Ассамблеясының жылы аясында мемлекеттік этносаясатты іске асыру технологиялары бойынша тыңдаушылардың кәсіби білімі мен білік-дағдыларын арттыру болып табылады.
Семинар барлық облыстардағы, Астана және Алматы қалаларындағы Мемлекеттік қызметшілерді қайта даярлау және біліктілігін арттырудың өңірлік орталықтары үшін онлайн-режимде көрсетілетін болады.
Осындай мазмұндағы республикалық, аймақтық және көшпелі семинар-тренингтер 2012 жылдан бастап еліміздің барлық өңірлерінде тұрақты түрде өткізіліп келеді. Ағымдағы жылы Павлодар, Ақтөбе, Орал, Петропавловск, Талдықорған және Астана қалаларында осындай семинарларды өткізу жоспарланып отыр.
