Е.Ыдырысов: Алматы қысқы олимпиада ойындарын өткізуге таптырмас жер

ҚР СІМ басшысы Қазақстан қысқы олимпиада ойындарын өткізуге өз кандидатурасын ұсынып, аталмыш конкурсқа қатысқанын мақтан тұтады деп атап өтті. «Біз Қазақстанды бүкіл әлемге паш ету мүмкіндігіне қуаныштымыз», - деді ол.

Е.Ыдырысов атап өткендей, Алматы қысқы олимпиада ойындарын өткізуге таптырмас жер болып табылады. «Алматының ең басты артықшылығы, ол оның географиялық орналасуы. Батыс және шығыс өркениеттерінің қиылысу нүктесінде орналасқан Алматы – Ұлы Жібек Жолының қазынасы, маңызды бөлігі болған»,- деп ерекше айтып өтті.

Министр хабарлағандай, Олимпиада ойындары өткізілетін орын ретінде Алматы таңдалған жағдайда, қамтитын территория бойынша алматылық олимпиада соңғы үш онжылдықта ең ықшамды болады. «Бұл жерде қажет инфрақұрылымның көп бөлігі дайын. 14 қажет объектілердің 8-і салынып, пайдалануға берілген, тағы үшеуі 2017 жылғы Универсиадаға орай салынатын болады. Тағы қосымша 3 объект салу қажет. Осылайша, Алматыдағы олимпиада соңғы онжылдықтарда ең аз шығынды болуы мүмкін. Бұл, сонымен қатар, қала үшін және жалпы Қазақстан үшін мол инвестициялар тартады», - деді Ыдырысов.

«Олимпиада ойындарын Алматыда өткізу барлық қазақстандықтар және болашақ ұрпағымыз үшін мақтан тұтарлық оқиғаға айналады. Бұл еліміздегі спорттың қыстық түрлерінің дамуына зор екпін береді. Бұл, сонымен қатар, кеңестік тарихы бар, 30 ең дамыған елдер қатарына кіруді көздеген еліміздің жетістіктерін, экономикалық және саяси табыстарын дүние жүзіне көрсету мүмкіндігі болып табылады», - деп атап өтті ол.

Сыртқы саяси мекеме басшысының сөзіне қарағанда, олимпиадаға орай салынатын объектілер одан әрі халыққа қызмет етеді, ал бұл болса, Халықаралық олимпиада комитетінің төрт жылда бір рет болатын спорт жарыстарының өткізу орнын таңдауына әсер ететін маңызды белгі.