• Басты
  • Ә. Жақсыбеков: Негізгі мақсат – тұрғындарды әлеуметтік жағынан қолдауды күшейту

Ә. Жақсыбеков: Негізгі мақсат – тұрғындарды әлеуметтік жағынан қолдауды күшейту

16 Ақпан, 2015 19:39
Бүгін Астана қаласының әкімі Әділбек Жақсыбеков кезекті апараттық жиналыс өткізді. Жиналыстың басты тақырыбы – Мемлекет басшысының өт өткен аптада Үкіметтің кеңейтілген отырысы кезінде айтқан бірқатар тапсырмаларын орындау, сонымен қатар, коммуналдық қызмет, көлік жүйесі мен денсаулық сақтау мекемелерінің жұмыстары.

Қала әкімдігі хабарлағандай, жиын басында Ә. Жақсыбеков елорданың қарқынды дамуы үшін мемлекет басшысының қойған талаптары мен тапсырмаларын орындаудың маңыздылығын атап өтті.

«Алдымызда тұрған басты талап – ол елорданың экономикалық өсімін сақтап қалу және тұрғындарды әлеуметтік жағынан қолдауды күшейту. Сондықтан бюджеттік қаржыны тиімді пайдалану және мемлекеттік органдардың нәтижелі жұмыс жасауы үшін бюджетті оңтайландыру бойынша тез арада ұсыныстар енгізуді тапсырамын.   Бұл арада жұмыс істеп жатқан жобаларды игеру ісіне басымдылық берілуі керек, - деді қала әкімі.

Қалалық басқармалардың жұмыс деңгейін айта келе Ә. Жақсыбеков елорданың көлік логистикасындағы жүйелі жұмыстардың жоқтығын, қала тұрғындарын ақпараттандыру ісінің сапасыздығын сынға алды. Мәселен қоғамдық көліктердегі жол ақысының қалай қалыптасатыны жайында мүлдем айтылмайтыны аталып өтті.

Су тасқынына қарсы шаралар мен қаланы қардан тазалау жұмыстары да сөз болды.

«Көктемгі су тасқынына қарсы шаралар белгіленген уақыт бойынша жүргізіліп жатқанына қарамастан, жеке сектор аумағынан қарды шығаруға бар күшті жұмсау керек, әсіресе, жылда су басу қаупі төнетін аудандардан. Аулаларды тазартуға көп көңіл бөлу қажет. Индустриалды парк пен ЖЭО-2 аумақтарында судың қауіпсіз еріп, ағуын қамтамасыз ету үшін Есіл, Ақбұлақ, Сарыбұлақ өзендерінің арналарын тазалау керек», - деді елорда әкімі.

 

 

Барлық жаңалықтар