2016 жылдан бастап әскери азаматтар толықтай мемлекеттік зейнетақы төлеу жүйесіне көшірілетін болады
Қорғаныс министрлігінен хабарланғанындай, бұл Қазақстанның зейнетақы төлеу жүйесін жаңғырту жөніндегі 2030 жылға дейінгі Тұжырымдамасының аясында қарастырылған. Осылайша әскер қатарында белгілі бір уақытқа дейін қызмет етіп немесе штатты ұйымдастыру мәселелері бойынша зейнетке шыққан азаматтар Отанды қорғау қызметінде болған жылдары үшін толықтай мемлекеттік зейнетақымен қамтамасыз етіледі.
1997 жылы жүргізілген зейнетақы реформасының талаптарына сәйкес, Қарулы Күштер қатарында болған жылдарына төленетін мемлекеттік зейнетақыны тек 1998 жылдың 1-ші қаңтарынан бастап қызмет еткендер немесе әскер қатарындағы өтілі 10 жылдан асқан азаматтар ғана ала алады. Ал 1998 жылдың 21-ші қаңтарынан бастап, әскер қатарына келгендер зейнетакқыларын жинақталған зейнетақы көлеміне қарай алады.
Сонымен қатар, биылғы жылдың 1-ші қаңтарынан бастап, Қазақстан Үкіметінің қаулысы негізінде Қарулы Күштерде қызмет етіп зейнетке шыққан азаматтардың зейнетақылары 9 пайызға көтерілді. Естеріңізге сала кетейік, Қарулы Күштер қатарында қызмет еткен жылдары үшін зейнетақы алатын азаматтардың кемінде 25 жылдық еңбек өтілі болуы керек. Оның 12,6 жылын үздіксіз әскер қатарында өткізуі керек.
