ОҚО-ның кәсіпкерлерге қызмет көрсету орталығында 13 мыңнан астам кәсіпкер оқыту курсын аяқтады

Облыс әкімдігі хабарлағандай, оның ішінде 2 218 бастауыш кәсіпкер болса, 462-сі әрекеттегі кәсіпкерлер, 719 адам жастар санатындағы азаматтар. Оқу курстарынан соң 640 азамат жалпы құны 1,7 млрд. теңге болатын жаңа бизнес жобаларды іске асырды.

«Соның нәтижесінде 400-ден астам жаңа жұмыс орындары ашылған. Кәсіпкерлік мектебі облысымыздың барлық аудан қалаларында өз ісін ашамын дейтін азаматтарға кәсіпкерліктің алғашқы дайындық курсын және арнайы семинар-тренигтер, сонымен қатар әрекеттегі кәсіпорындар мен шаруа қожалықтары базасында тәжірибелік мастер класстар өткізіп, кәсіпкерлерге жан-жақты қолдаулар көрсетуде», - делінген хабарламада.

Биылғы жылы Кәсіпкерлік мектебі елімізде алғаш рет жаңадан бірнеше жобаны іске қосып отыр. Оның ішінде жастарға арналған арнайы «Өркен» жобасы бар. Бұл өз ісін ашамын дейтін 18-29 жас аралығындағы жастар, оқу орындарының бітіруші курс студенттеріне арналған бағдарлама. Келесі жоба «Сәтті бастама» деп аталады. Жоба бастауыш кәсіпкерлер үшін, оның ішінде өз ісін ашамын дейтін жұмыссыздар, жұмыспен өз бетінше қамтылғандар және жеке тұлғаларға бағытталған. Биылғы жылдың тағы бір жаңа жобасы «Өрлеу» бағдарламасы.

Бұл жобада жекелеген қысқа мерзімді тақырыптық тренигтер, семинарлар, тәжірибелік-далалық мастер-класстар өткізіліп тұрады. Бұл оқытуларға шағын және орта бизнес субъектілерінің басшылары мен қызметкерлері, белсенді кәсіпкерлер және шаруалар қатысады. Бүгін осы мектепте 32 сағаттық тегін оқыту курсы басталды. «Өркен» және «Сәтті бастама» бағдарламасы бойынша 98 адам оқыту курсын аяқтап, сертификат алғалы отыр. Оның ішінде 60-қа жуығы – жастар. Тренинг аясында жастарымыз бастапқы капиталсыз бизнесті бастаудағы мүмкіндіктері мен бизнес-жоспарды қалай дайындау керек екендігін, салық салу есептілігі мен бизнестің құқықтық аспектілерін үйреніп шықты.