Еліміздің аймақтарындағы жұмыс орындарын анықтау шарасы биылғы жылдың 15-ші наурызында аяқталады

13 Ақпан, 2015 17:49

Денсаулық сақтау және әлеуметтік даму министрлігі аймақтардағы жұмыс орындарының көлемін анықтауды биылғы жылдың наурыз айында аяқтайды. Біз қазіргі таңда барлық мемлекеттік және атқарушы органдармен «Нұрлы жол» бағдарламасының аясында жүзеге асырылатын жобаларды анықтау үстіндеміз»,-деді Денсаулық сақтау және әлеуметтік даму министрі Тамара Дүйсенова Орталық коммуникациялар жүйесінде өткен брифингте.

Министрдің мәліметтері бойынша, еліміздің аймақтарындағы жұмыс орындарының нақты санын анықтау жұмыстары биылғы жылдың наурыз айының 15-де аяқталады.

«Анықталған жұмыс орындарына бірінші кезекте жұмыстан босап қалған азаматтар орналастырылады, егер ондайлар болса әрине. Екіншіден біз бұл жұмыс орындарына жұмыссыз жастардан құрылған әлеуметтік топтарды жібереміз. Сондай-ақ онда өзін-өзі жұмыспен қамтыған және әлеуметтік жағынан аз қамтылған топтардың өкілдері жөнелтіледі.

Бұл бағыттағы жұмыстарды «Жұсмыспен қамтудың жол картасы - 2020» бағдарламасының аясында жұмыс істеп жатқан жұмыспен қамту орталықтары жүзеге асыратын болады»,-деді министр.

Естеріңізге сала кетейік, өткен аптада Қазақстанның Үкімет мүшелері еліміздің аймақтарын аралап, онда ең ірі деген кәсіпорындармен 17 мың меморандум жасады. Бұл меморандумдарға сәйкес, еліміздің 1 миллионға жуық тұрғыны жұмыспен қамтылады, бұл республика халқының экономикалық жағынан белсенді тобының 11 пайызы.

Камила Амирова

Барлық жаңалықтар