Е.Ыдырысов: Қазақстан Алжирді өзінің сенімді әрі конструктивті әріптесі ретінде қарастырады

Алжирлік қонақты қазақ жерінде қошеметтей отырып, ҚР СІМ басшысы Қазақстан жалпы араб елдерімен, соның ішінде Магриба мемлекеттерімен өзінің қарым-қатынасын нығайта түсуге ұмтылып отырғанын айтып өтті. «Қазақстан Алжирді өзінің Африка континентіндегі және жалпы Араб әлеміндегі сенімді әрі конструктивті әріптесі ретінде қарастырады», - деді ол.

Кездесу аясында 2013 жылы Қазақстан Африка Одағына бақылаушы статусына ие болғаннан бастап еліміздің Африка мемлекеттерімен жан-жақты қарым-қатынастардың біртіндеп даму динамикасы байқалатыны аталып өтілді.

Е. Ыдырысов Алжирдің «ЭКСПО-2017» Халықаралық мамандандырылған көрмесін өткізуге Астананың кандидатурасын қолдағаны үшін Алжирге алғысын білдіріп, көрмені дайындау мен өткізуге белседі қатысуға шақырды. Сонымен қатар, ол Қазақстанның БҰҰ Қауіпсіздік Кеңесіне 2017-2018 ж.ж. тұрақты емес мүшелігіне ұсынымын Алжир қолдайды деп сенімін білдірді.

«Келіссөздер барысында тараптар екі ел арасындағы ынтымақтастықты кеңейту қажеттілігіне назар аударды. Екіжақты қарым-қатынасты нығайту мақсатында, көпжақты институттар шеңберіндегі үйлесімділікті күшейту және алдағы уақытта бір-бірінің бастамаларына қолдау көрсету үшін Қазақстан мен Алжир сыртқы саяси ведомстволары арасында өзара ақпарат алмастыру тәжірибесін қарастыру ұсынылды», - делінген хабарламада.

Қазақстан Алжир экономикасын қызықтыра алатын тауарлар мен өнімдерді, соның ішінде металлургиялық, химиялық, мұнай өнеркәсібі, сондай-ақ ауылшаруашылығы салаларындағы және т.б. өнімдердің кеңауқымды таңдауын ұсына алатыны жеткізілді. Е.Ыдырысов екі ел іскер топтары өкілдерінің кездесуі мемлекеттердің сауда-экономикалық байланыстарына оң әсерін тигізетінін атап өтті.