Қазақстандық жастар көбіне техникалық мамандықтарға әуес - Қ.Бөрібеков (ВИДЕО)

13 Ақпан, 2015 11:32

Индустриалды-инновациялық даму мемлекеттік бағдарламасы аясында қазақстандық жастар көбіне техникалық мамандықтарды таңдауда. Бұл туралы Strategy2050.kz ақпарат агенттігінің тілшісіне берген сұхбатында «Кәсіпқор» холдингінің» Басқарма төрағасының орынбасары Қадірбек Бөрібеков айтты.

«Қазіргі таңдағы жастардың мамандық таңдаудағы талғамдарына зер салып қарайтын болсақ, олардың көбіне техникалық мамандықтарға көп көңіл бөлетіндігін байқаймыз. Бұл дұрыс. Өйткені олар техникалық мамандықты мықты игерген азаматтардың қашанда сұранысқа ие екендігін жете түсінеді»,-деді Қ.Бөрібеков.

Оның министрлік мәліметтеріне сүйене отырып келтірген деректері бойынша, бүгінде елімізде 850 колледж бар болса, олардың жартысына жуығы жеке меншікте. «Ал жеке меншіктегі колледждер негізінен гуманитарлық мамандықтарға оқытады. Олардың арасында экономика, қаржы, құқықтану сияқты мамандықтар көп кездеседі. Ал техникалық және технологиялық бағыттағы сонымен қатар, ауыл шаруашылығы саласының агроном, механик, фермер сияқты мамандары бюджет есебінен оқытылады. Өйткені техникалық мамандықтарға үйрету кем дегенде 3 есеге қымбат»,-деді Басқарма төрағасының орынбасары.

Оның пайымынша, техникалық мамандық иелерін өз саласының шебері етіп шығару үшін оларды өз кәсібін меңгертіп, тиісті құрылғыда жұмыс істеуге үйретіп, тіпті оған машықтандыру да қажет болады.

Индира Қауметова

Барлық жаңалықтар