ШҚО-да 127 әлеуметтік нысанның құрылысын аяқтауға 2 млрд. теңге бөлінді (ФОТО)

ШҚО-ның Ақпараттық орталығынан хабарлағандай, Аймақ басшысы құрылысы жүріп жатқан облыстық қан орталығы, «Самұрық Қазына жылжымайтын мүлік қорының» мердігерлігіндегі 9 монолитті тұрғын үй кешені, оңалту орталығы мен облыстық драма театрды аралады. «Жоспар бойынша қан орталығы 1 сәуірге, ал драма театры 1 мамырға дейін пайдалануға берілуі тиіс», - делінген хабарламада.

Шаһардағы әлеуметтік маңызды нысандардың құрылыс жұмыстарына оң бағасын берген Даниал Ахметов кезектегі өзге де нысандар кешеуілдемей халыққа пайдалануға берілу керектігін атап өтті. Бұл орайда, медициналық мекемелер, мектептер мен балабақшалардың құрылысын аяқтауға баса маңыз берілмек.

«Әлеуметтік нысандар мен тұрғын үйлердің барлығын есептегенде облысымызда 127 нысанның құрылысы жүріп жатыр. Кейбіріне құрал-жабдық жеткіліксіз болса, кейбірінің құрылыс жұмыстарында ақаулар табылды. Біз биыл міндетті түрде ол нысандарды аяқтау үшін қаржыландыратын боламыз. Облыстық бюджеттен аталмыш жұмысқа 2 млрд. теңге бөлінеді. Жаңа нысандардың құрылысын бастаудың қажеті шамалы. Елбасы Н.Назарбаев тапсырғандай мемлекет қаржысын орынды пайдалануымыз керек. Ендігі кезекте 2 млрд. теңге 127 нысанның құрылысын аяқтауға жетуі тиіс», - деді Д. Ахметов.