Қазақстанда оқушылардың 30 пайызы жергілікті бюджеттердің есебінен тегін тамақтанады
12 Ақпан, 2015 17:18
Қазақстанда мектеп оқушыларының 30 пайызы жергілікті бюджеттер есебінен тегін тамақтанады және балаларды тегін тамақтандыру тоқтатылмайды. Бұл туралы бүгін Білім және ғылым министрлігінің кеңейтілген алқа мәжілісінде аталмыш ведомство басшысы Аслан Сәрінжіпов мәлім етті.
«Балаларды тамақтандыру мәселесіне келетін болсақ, бүгінде оқушылардың 30 пайызы жергілікті бюджеттердің есебінен тамақтанады. Тегін тамақты барлық әлеуметтік топтағы балалар, кей аймақтарда тіпті бастапқы сыныптың оқушылары да алады. Балаларды тегін тамақтандыру жұмыстары бойынша ешқандай өзгерістер болмайды»,-деді алқа мәжілісінің барысында журналистердің сауалдарына жауап берген А.Сәрінжіпов.
Бұл ретте ол бюджет есебінен тамақтанып келе жатқан балалардың тегін тағамды әлі де пайдалана беретіндігін ескертіп, «бұл бағытта біз біз ешқандай да қысқартуларды жоспарлап отырған жоқпыз»,-деді Білім және ғылым министрі.
Индира Кауметова
