Қ.Жақыпов пен Түрікменстан елшісі екіжақты ынтымақтастық мәселелерін талқылады
«Тараптар екіжақты ынтымақтастық бағытындағы кең ауқымды мәселелерді талқылай отырып, отын-энергетикасы, ауыл шаруашылығы, көлік және коммуникация сияқты салаларды болашағы зор басым бағыттар ретінде атап өтті», - деп хабарлайды Мәжілістің баспасөз қызметі.
Осы орайда Қ.Жақыпов пен М.Акмырадов Қазақстан мен Түрікменстан арасындағы қарым-қатынастарды жоғары бағалады. Олардың пікірлерінше, тұрақты даму үдерісіне екі елдің мемлекет басшылары тың серпін беріп отыр.
Келіссөздер барысында әлемдік экономикадағы жаһандық үдерістер туралы сөз қозғаған Мәжіліс спикері Қ.Жақыпов, Қазақстан басшысының елімізге кері әсерін тигізуі мүмкін дағдарысқа төтеп беруге бағытталған саясатының басым бағыттарына тоқталды.
Өз кезегінде түрікменстандық дипломат Нұрсұлтан Назарбаевтың көрегенді саясаткер екендігін атап өте келе Қазақстанның даму қарқынын ерекше атап көрсетті. Кездесу барысында, сонымен қатар парламентаралық байланыстарды нығайтуды белсенді жүргізу қажеттігіне ерекше көңіл бөлінді. Қ.Жақыпов түркменстандық әріптесін биылғы жылдың күз айында елордада өтетін түркітілдес мемлекеттердің Парламентаралық Ассамблеясының пленарлық мәжілісіне қатысуға шақырды.
