Әскери кеңес Құрлық әскерінің одан әрі даму бағытын анықтады – Қорғаныс министрлігі

«ҚР Қорғаныс министрінің Қарулы Күштерді дамыту жөніндегі талаптары аясында жауынгерлік әзірлікті қолдау мен әскерлердің жауынгерлік жаттығуларын әрі қарай жетілдіруге ерекше көңіл бөлінді. Әскери кеңес басты күш-жігерді әскерлерді халықаралық қауіпсіздікке төнген қауіп-қатерге төтеп беру үшін әскери бөлімдер, бөлімшелер, құрылымдық бөлімшелердің іс жүзіндегі әрекеттерін жетілдіруге бағыттау қажеттігін белгілеп берді», - делінген хабарламада.

Сонымен қатар, әскери кеңес әскери тәртіп пен құқық тәртібі мәселесіне де айрықша назар аударды. Жаңа Қылмыстық кодексті қолдану ерекшеліктерін ескере отырып, Елбасы айқындап берген «құқық бұзушылыққа нөлдік төзімділік» бағдары ерекше орын алатын болады, деп хабарлады ведомство.

Ал әскери қызметшілер үшін қолданыстағы заңнама талаптарына сәйкес өмір сүру күнделікті тіршілік қалпына айналуы тиіс. Әскери кеңестің күн тәртібінде әскери университеттер, академияларға кандидаттарды іріктеп жіберу мәселесі және әскери қызметшілерді Қорғаныс министрлігі мен мемлекет басшылығының көтермелеуіне ұсыну мәселелері қаралды.  Алқа мүшелері әр кандидатты жеке қарастырып, олардың қабілеттері, қызметтік тәжірибесі мен сіңірген еңбегін ескерді.

Сонымен қатар, Әскери кеңес Құрлық әскерлерінің әрі қарай даму бағыттарын, ауқымды оқу-жаттығуларға бөлінетін қаражат, жұмылдырылатын күштер мен мерзімдерін, Ұлы Жеңістің 70-жылдығына арналған әскери парадқа қатысатын Құрлық әскерлерінің топтарын даярлау тәртібін нақтылады.