Әскерилер Жоғары Бас қолбасшы атынан соғыс ардагерін 90 жылдық мерейтойымен құттықтады (Фото)

12 Ақпан, 2015 10:13

ҚР Қорғаныс министрлігінің ақпараттық-насихаттау тобы Қарағанды гарнизонына келді. Бұл жерде Ұлы Отан соғысы ардагерлерінің әрқайсысына көмек көрсету бойынша ауқымды акция өтуде.

ҚР Қорғаныс министрлігі хабарлағандай, олар Республикалық Ұлы Отан соғысының ардагерлеріне медициналық көмек көрсету орталығында майдангер Кирилл Лысякты 90 жасқа толған мерейтойымен құттықтады.

Азаткер жауынгерді ҚР ҚК Жоғары Бас қолбасшысы атынан Бас штаб бастығының орынбасары – ҚР ҚК БШ Тәрбие және идеологиялық жұмыстар жөніндегі департаментінің бастығы полковник Мұхамеджан Таласов құттықтап, ардагерге грамота мен бағалы сыйлықтар табыс етті.

Қарағанды облысындағы акция өз бастауын Алматы қаласынан алған ауқымды іс-шаралардың жалғасы екендігін айта кеткен жөн. Ұлы Отан соғысының ардагерлері әскерилер тапынан келіп түсіп жатқан құттықтаулар, алғыс хаттар мен естелік сыйлықтарды қабыл алуда. ҚР Қорғаныс министрлігі Орталық ансамблінің әртістері соғыс ардагерлеріне өздерінің мерекелік бағдарламаларын сыйға тартты.

Барлық жаңалықтар