Астана студенттері «Ардагер» акциясы аясында ҰОС ардагерлеріне көмек көрсетуде (Фото)

Жастар Александр Бибичевтің үйіне барып, денсаулығын тексеріп қайтты.

Александр Семенович Бабичев 1921 жылы 4 сәуірде Ақмола облысында дүниеге келген. 1941 жылы Қызыл әскер қатарына шақырылған. Александр Семенович Чехословакияға дейін соғыс жолын жүріп өтті. Майданда ардагер қатардағы минометшыдан Екінші украиналық майданның 12-ші гвардиялық минометтық ротаның командиріне дейін көтерілді. Ардагер Курск, Украина, Румыния, Чехословакия жерлерінде жауға қарсы шабуылдарға қатысты. Александр Бабичев үшін Ұлы Отан соғысы Братислава қаласында аяқталды.

Ұлы Отан соғысының ардагері қан майданды кешіп өтсе де әлі күш-қуатын жоғалтпаған. Осы орайды пайдаланып кейіпкеріміз өскелең ұрпаққа өзінің ақжарма тілектерін айтты.

 «Жастарды өз Отандарын сүюге шақырамын. Әрбір ер азамат өз Отанын қорғау керек. Бүгінде шет елдерге оқуға кетіп жатқан жастар елге қайтып оралып, мемлекетіміздің өркендеп, дамуына сүбелі үлестерін қосса деп тілеймін», - дейді ол.

Сондай-ақ, 92 жасар Иван Афанасьевич Заиченко студенттердің келгеніне қуанды. Ардагердің денсаулығы емін-еркін орын ауыстыруға мүмкіндіәк бермейді. Екі сағат қас-қағым сәтте өтті, студенттер үй шаруасына көмектесіп, студенттік өмірдің қызықты оқиғаларын айтты.

Басқарма хабарлағандай, бұл ең алдымен, қарттарға көңіл бөліп, үнемі қамқорлық көрсетуге бағытталған акциялар. Қаржылай шығын болмайтын, бірақ рухани, психологиялық және тәрбиелік мәні бар іс-шаралар.