Әскери білім беру жүйесін жаңа деңгейге шығару қажет – ҚМ (Фото)
«Іс-шараның басты мақсаты - Қорғаныс министрлігіне қарасты ұйымдар мен Қазақстанның арнайы мемлекеттік және құқық қорғау органдарындағы білім және ғылым қызметін ұйымдастырудың ерекшеліктерін талқылау», - деп хабарлады Қорғаныс министрлігі.
Әскери ғалымдар қазіргі таңда Қазақстандағы әскери кадрларды даярлау жүйесіне, әскери қызметшілерге, Қарулы Күштеріміздің бейнесіне қойылатын талаптар өзгерісіне сай келмей отырғанына тоқталды.
Әскери саланың оқуға қабылдау, түлектерді даярлау, соңынан оларды әскер бөлімдердегі белгілі бір лауазымдарға тағайындаудан бастап, қызмет бойынша жұмыс орнын ауыстыру, кәсіби біліктіліктерін жоғарылату, әскери қызметшілерді қайта оқытуға дейін өзіндік өзгешеліктері бар.
Сәйкесінше, әскери білім беру жүйесіне оқуға қабылдау, ауыстыру және қайта қабылдаудың арнайы ережелері жасалуы қажет. Осыған байланысты, Қорғаныс министрлігі Ұлттық ғылыми кеңес тізіміне «Қорғаныс және қауіпсіздік» атты ғылыми бағытты қосу және өзекті проблемаларды шешуге бағытталған заңна жасау туралы ұсыныс дайындалды.
Аталмыш мәселені Ұлттық қорғаныс университеті өкілдері және әскери білім мен қызметтің ерекшеліктерін жақсы білетін генералдар Бақытжан Ертаев мен Абай Тасболатов сияқты Мәжіліс депутаттары егжей-тегжейлі талқылады. Дөңгелек үстелге қатысушылар әскери білім беру жүйесін заңды түрде бекіткен соң аталмыш мәселенің сапалық жаңа деңгейге көтерілетіндігінде сенім білдірді.
