10 Ақпан, 2015 19:41

17 ел ЭКСПО-2017 көрмесіне қатысатынын растады

ЭКСПО-2017 Халықаралық мамандандырылған көрмесіне қатысушы елдерді тарту бойынша келіссөздер барысының қарқыны үдеуде. Көрмеге қатысатынын 17 ел ресми түрде растады, олардың арасында ТМД мен Еуропалық Одақ елдері бар, деп хабарлады Ұлттық компания.

Қазақстан 2014 жылдың 11 маусымында Парижде өткен ХКБ Бас ассамблеясының 155 сессиясында ЭКСПО-2017 Халықаралық мамандандырылған көрмесі ресми түрде мойындалғаннан кейін қатысушыларды шақыру құқығын алды. Қазақстан Президенті атынан дипломатиялық арналар арқылы 140-тан аса ел мен 12 халықаралық ұйымға ЭКСПО көрмесіне қатысуға шақыру жіберілді.

Келіссөздер барысында 17 мемлекет (Әзірбайжан, Ангола, Армения, Беларусь, Германия, Грузия, Индия, Қырғызстан, Монако, Ресей, Сенегал, Сент-Китс және Невис, Түркіменстан, Өзбекстан, Тәжікстан, Израиль және Түркия) және 3 халықаралық ұйым (АТМЭӘК, ЭЫДҰ және БҰӨДҰ) Астанадағы көрмеге қатысатынын ресми түрде растады.

Биылғы жылы ЭКСПО-2017 комиссары – Сыртқы істер министрінің бірінші орынбасары Рәпіл Жошыбаевтың алдында 80 елдің ЭКСПО-ға қатысатынын растау бойынша ауқымды міндет тұр. Еуропа, Америка және Азия елдеріне сапарлар жоспарланған. Халықаралық қатысушыларды тартумен қатар, Комиссар ЭКСПО-2017 көрмесін халықаралық алаңдарда ілгерілету бойынша жұмыс жүргізуде және шетелдік елдердің туризм министрлерімен, туристік қауымдастықтардың басшыларымен келіссөздер жүргізуде.

ЭКСПО-2017 Комиссарының келесі жұмыс сапары Германия мен Бельгияға жоспарланып отыр.

Барлық жаңалықтар