ШҚО «Қазақстан халқы Ассамблеясы жылының бастауы» синхрон-акциясына қосылды (ФОТО)

2015 жыл ҚР Президенті Жарлығымен Ассамблея жылы болып бекітілген. Осыған орай, Қазақстанның барлық облыстарында бір уақытта «ҚХА жылы» синхрон акциясы өткізілді. Ашық аспан астында Өскемен қаласының сол жағалауындағы Комсомол аралында аталмыш акция 7 мың шығысқазақстандықтың басын қосты.

Саланатты жиында ҚХА жылының туын көтеру құрметі Олимпияда чемпионы Ольга Рыпакова мен ардагерлерге, этномәдени бірлестіктер өкілдеріне берілді.

ҚР Президенті Н. Назарбаевтың құттықтауын жеткізген Даниал Ахметов Ассамблеяның маңыздылығына мән берді.  «Биыл еліміз бойынша 5 ірі мерейтойдың атап өтілуі жоспарлануда. Бүгін Қазақстан халқы Ассамблеясы жылы басталды. Ассамблея этностарды бір шаңыраққа біріктіреді. Біздің ендігі ортақ мүддеміз – көпұлтты еліміздегі осы бірлікті, ынтымақты, достықты сақтау», – деді облыс әкімі.

Салтанатты жиын мерекелік концертке ұласты. Бұдан кейін шаңғы жарысы ұйымдастырылды. Акцияның қатысушыларына «Достық дастарханы» жайылып, жастар «Біз достықпен күштіміз» деген атаумен флеш-моб өткізді.