Қазақстанда химиялық және радиациялық апаттардың зардабын жоюға бағытталған республикалық дайындық өтеді
«Бүгін Астанада ТЖМ вице-министрі Валерий Петровтың жетекшілігімен «Химиялық, биологиялық және радиациялық апаттарды жою кезінде басқару органдарының қимылы» тақырыбында «Қатер 2013» атты Республикалық командалық –штабтық оқу-жаттығу басталды», - делінген баспасөз баянында.
Хабарламада айтылғандай, жаттығуға Ішкі істер, денсаулық сақтау, индустрия және жаңа технологиялар, қорғаныс, қоршаған ортаны қорғау, өңірлік даму, ауыл шаруашылығы,көлік және коммуникация министрлітері мен әкімдіктер, облыс пен қалалардың төтенше жағдайларды жою мен ескерту комиссиясы мен азаматтық қорғаныс комиссиясы және ҚР ТЖМ-нің ведомствоға қарасты және аймақтық бөлімшелері қатысады.
Айта кету керек, жаттығу барысында химиялық, биологиялық және радиациялық апаттар болуы мүмкін кезде құрылатын апаттық құтқару қызметінің дайындығы, құрамы, талапқа сай келуі мен саны тексеріледі.
«Жаттығу 2 кезеңмен өткізіледі. Бірінші кезеңде орталық және жергілікті органдар басқармасы, ТЖ жою мен ескерту комиссиялары, облыстар мен Астана, Алматы қалаларындағы ТЖ және МО қызметі берілген жағдайға сараптама жасайды», - делінген хабарламада.
