«Алтай - түркі әлемінің алтын бесігі» халықаралық форумы Қазақ хандығының 550 жылдығы аясында өтеді

5 Ақпан, 2015 20:24

Биылғы жылы дәстүрлі «Алтай - түркі әлемінің алтын бесігі» халықаралық форумы Қазақ хандығының 550 жылдығы мерекесі аясында өтеді, деп хабарлады ШҚО әкімінің орынбасары Жақсылық Омар ақпараттық орталықтағы брифингте.

«Қазақ хандығының 550 жылдығын мерекелеу аясында облыста «Алтай - түркі әлемінің алтын бесігі», «Бірлігіміз жарасқан» этнофестивалі сияқты ірі халықаралық шаралар өтеді, Ы. Досханұлы атындағы қазақ күресі, Т. Атаев атындағы дзюдо бойынша спорт турнирлері жоспарланған», - деді облыс әкімінің орынбасары Ж. Омар.

Облыста 40 шара жоспарланған. «Қазақ хандығы» картиналары көрмесін, қазақтың көшпенді этнографиясы мен мәдениетінің киіз үй үлгілері байқауы, қазақ хандығы тарихы туралы ақпараттық-ағарту бағдарламасы, «Тағылымды тарих» жастар форумын өткізу жоспарланған.

Қазақ хандығы тарихын насихаттауға театр, мұражай, кітапхана өз үлестерін қосады.

Барлық қалалар мен аудандардағы мәдениет, білім беру мекемелерінде тақырыптық мәдени-бұқаралық, ақпараттық-танымдық шаралар өтеді.