ОҚО-да 50 мың жұмыс орнын сақтап қалу бойынша меморандумдарға қол қойылды

4 Ақпан, 2015 12:38

Оңтүстік Қазақстан облысында ҚР Премьер-Министрінің бірінші орынбасары Бақытжан Сағынтаевтың жұмыс сапары аясында жергілікті мазмұнды дамыту және бизнестің әлеуметтік жауапкершілігі мәселелері бойынша орталық мемлекеттік органдардың ұлттық компаниялардың, аймақтағы жүйені қалыптастыратын ірі кәсіпорынлардың өкілдерінің қатысуымен жиын өткізді, деп хабарлады ОҚО әкімдігі.

ҚР Премьер-Министрінің бірінші орынбасары Бақытжан Сағынтаевтың төрағалығымен өткен жиын соңында Оңтүстік Қазақстан облысының әкімдігі мен «Қазатомпром», «Қазақтелеком», «ҚазМұнайГаз», «Самұрық Энерго» АҚ арасында жергілікті мазмұнды дамыту жөнінде меморандумдарға қол қойды.

Жұмыс орындарын сақтап қалу және өндірістік процесстерді тұрақтандыру мақсатында Оңтүстік Қазақстан облысының әкімдігі мен өңірдегі ірі өндіріс орындары, оның ішінде «Қазатомпром», «Кентау трансформатор зауыты» АҚ-ы, «ПетроҚазақстан ОйлПродактс», «Стандарт цемент» ЖШС және т.б. арасында меморандумдар түзілді.

Жалпы алғанда осы бағыттағы жұмыстардың нәтижесінде облыста 50 мың жұмыс орындарын сақтап қалуға арналған 1057 меморандумға қол қойылған. Оңтүстік Қазақстан облысы әкімдігі тарапынан өткен жылы өңірдегі кәсіпорындарды қолдауға арналған іс-шаралар жоспары бекітілген. Қолға алынған шаралардың тиімділігі ескеріліп, облыс әкімдігі дәл осындай құжатты 2015 жылы да қабылдап отыр.

Қазіргі таңда өңірдегі өндіріс орындарында кездесіп отырған түйткілді түйіндерді дер кезінде шешіп отыру үшін жұмысшы тобы құрылған. Бұл бағыттағы жұмыстар аудан, қала әкімдіктерінде де қолға алынып отыр. Өңірдің барлық аудан, қалаларында кәсіпкерлік мектептерінің құрылысы аяқталып келеді. Мұнда ісін енді бастап отырған кәсіпкерлерге бизнес негіздері оқытылады деп күтілуде.

Барлық жаңалықтар