Egov порталы шетелге шығуға тыйым салу мен ЖҚЕ бұзғаны үшін айыппұл туралы хабарламаларды жіберетін болады

3 Ақпан, 2015 17:09

Қазақстанның электрондық үкіметі порталының хабарламалар қатары толықты. Олардың ішінде азаматтардың қарызгерлер тізіміне қосылуы, ҚР-нан шығуға тыйым салынғаны, көлікті техникалық байқаудан өткізу қажеттілігі мен жол қозғалысы ережелерін бұзғаны үшін айыппұлдардың түскені туралы хабарламалар бар.

«Ұлттық ақпараттық технологиялар» АҚ хабарлағандай, хабарламалар электрондық үкімет порталының «Жеке кабинетіне», сондай-ақ, «Дербес құжаттамада» көрсетілген электронды мекен-жай мен ұялы телефон нөміріне келеді.

«Электрондық үкімет порталы арқылы хабардар ету механизмі азаматтарға айыппұлдар, салықтар және т.б. өтелмеген төлемдердің себебінен шетелге шығуға тыйым салыну сияқты күтпеген жағдайларды болдырмауға мүмкіндік береді» - дейді «Ұлттық ақпараттық технологиялар» АҚ-ның басқарма төрағасы Руслан Еңсебаев.

Естеріңізге салсақ, жақында egov порталында жаңартылған «Жеке кабинет» іске қосылды. Қазіргі таңда портал пайдаланушылары 11 түрлі хабарлама алады. Олардың қатарында мекен-жай деректерінің өзгеруі, куәландыру құжаттарын немесе жүргізуші куәлігін ауыстыру қажеттілігі мен мектепке дейінгі мекемелерге кезектің өзгеруі және тағы басқа хабарламалар бар.

Барлық жаңалықтар