Суретші, монументалды мектептің негізін қалаушылардың бірі Қанапия Телжанов 86 жасында өмірден озды

2 Қазан, 2013 16:31

Суретші, қоғам қайреткері, КСРО және Қазақ ССР халық суретшісі, ҚР ҰҒА академигі, монументалды мектептің негізін қалаушылардың бірі Қанапия Телжанов қайтыс болды, деп хабарлайды ҚР Мәдениет және ақпарат министрлігінің баспасөз қызметі.

Қанапия Телжанов 1947 жылы Алматы көркемөнер училищесін, 1953 жылы Ленинград көркемөнер, мүсін және архитектура институты көркемөнер факультетін бітірді. В 1953-1958 жылдар аралығында Алматы театр-көркемөнер училищесінде сабақ берді.

Қанапия Телжанов Қазақстан суретшілер одағының төрағасы, КСРО суретшілер одағы мүшесі және хатшысы, Ә.Қастеев атындағы мемлекеттік өнер мұражайының директоры қызметтерін атқарды. 1967 жылы Қазақ ССР Мемлекеттік сыйлығының лауреаты атанса, 1981 жылы профессор атағы берілді.

«Телжанов шығармашылығында халық тұрмысы мен ұлттық болмыс байқалады. Халық тұрмысына арнаған бірнеше шығармасынан кейін ол монументалды суреттерге қарай ойысты», - делінген хабарламада.

Суретшінің Қазақстан бейнелеу өнерінің дамуына қосқан үлесі зор. Оның кескіндемелері Мәскеудегі Третьяковск галереясының коллекциясы мен Ә.Қастеев атындағы мемлекеттік өнер мұражайында, сонымен қатар Еуропа мен Азияның жеке жинақтарында сақталған.

Барлық жаңалықтар