Жамбыл облысы жетекшілері студенттерге бюджеттік жоспарлау негіздерін түсіндірді
2 Қазан, 2013 09:23
Жамбыл облысы әкімінің орынбасары Ғани Сәдібеков Тараз мемлекеттік педагогикалық институтының студенттеріне өңірлік экономика мен бюджетті жоспарлау негіздері жөнінде кездесу өткізді, деп хабарлайды облыс әкімдігінің баспасөз қызметі.
Ғани Сәдібеков болашақ ұстаздарға өңірлік экономика мен бюджетті жоспарлау негіздері туралы айтып, бірқатар сұрақтарға жауап берді.
«Біз еліміздің болашағы жастар туралы жиі айтамыз. Алайда сол жастарға өңірлік экономика мен облыстың әлеуметтік-экономикалық өміріне әсер ететін факторлар жайында ештеңе демейміз. Жастарымыз болашақта күш-жігерін өңірдің экономикалық дамуына жұмсауы үшін осы тақырыпты жиі қозғауымыз керек», деді ТарМПИ ректоры Дария Қожамжарова.
Шараны ұйымдастырушылар қатарында жастар саясаты мәселесі жөніндегі облыстың басқарма да бар.
Айта кету керек, облыс басшысы мен оның орынбасарлары және аппарат жетекшілері студенттермен диалог алаңына қатысады. Облыстың басқарма басшылары ЖОО студенттеріне лекциялар өткізбек.
