Астана мен Алматыда ұялы байланыстың мыңнан астам негізгі станциясы орнатылады

«Астана мен Алматыда ұялы байланыстың сапасын арттыру мақсатында 1001 негізгі станция орнатылады», - делінген хабарламада.

Осыған орай, ұялы байланыс операторлары тарапынан Астана мен  Алматы қалаларында 461 қосымша негізгі станция орнатылған.

Хабарламада айтылғандай, ағымдағы жылдың соңына дейін ұялы байланыс операторлары тағы да 540 қосымша негізгі станция орнатуды жоспарлап отыр. Ұялы байланыс сапасын көтеру мақсатындағы аталмыш жұмыстар ҚР ККМ байланыс және ақпарат Комитетінің ұсынуы негізінде ұялы байланыс опреаторлары тарапынан жасалмақ.

«Өткен жылы министрлік тарапынан түрлі стандарттардағы ұялы байланыс қызметінің техникалық сапа бақылау мен сигнал параметрлерінің өлшемі үшін арнайы сараптама құралдары сатылып алынған. Солардың көмегімен желінің қол жетімділігі мен сигнал мен байланыс сапасын сараптауға болады», - дейді ҚР ККМ байланыс және ақпарат Комитетінің төрағасы Ризат Нұршабеков.

Естеріңізге сала кетейік, Мемлекет басшысы Астанада өтетін «ЭКСПО-2017» мамандандырылған халықаралық көрмесін өткізу туралы Мемлекеттік комиссия отырысында ККМ-не ұялы байланыс қызметінің сапасы мен қол жетімділігін арттыруды тапсырған болатын.