Қазақстан мен Чили дипломатиялық және қызметтік паспорт иелеріне виза жүйесін алып тастау туралы келісімге қол қойды
1 Қазан, 2013 17:06
Латын Америка елдеріне сапары аясында ҚР Сыртқы істер министрі Ерлан Ыдырысов пен Чилидің Сыртқы істер министрі міндетін атқарушы Альфонсо Наварро екі ел арасында дипломатиялық және қызметтік паспорт иелеріне виза жүйесін алып тастау туралы келісімге қол қойды, деп хабарлайды ҚР СІМ баспасөз қызметі.
Екі елдің азаматтарының өзара қатынау ережесін жеңілдету мәселесі кездесудің басты тақырыбына айналды. Бұл бағыттағы маңызды қадам келіссөздер барысында қол қойылған Дипломатиялық және қызметтік паспорттар иелерін визалық талаптардан босату туралы Келісім болды. Тараптар екі елдің азаматтары үшін жақын болашақта толығымен визалық талаптарды жою бойынша келісімге жету мақсатында келіссөздерді жалғастыра беруге уағдаласты.
Сондай-ақ, А.Наварро қазақстандық тарапты Чилидің Астанада дипломатиялық өкілдік ашуды жоспарлап отырғаны туралы ақпараттандырды.
