Н.Назарбаев пен П.Порошенко Украинадағы қазіргі ахуалды талқылады
15 Қаңтар, 2015 20:27
Қазақстан Республикасының Президенті Нұрсұлтан Назарбаев Украина Президенті Петр Порошенкомен телефон арқылы сөйлесу барысында Украинадағы қазіргі ахуалды, сондай-ақ екіжақты ынтымақтастық мәселелерін талқылады, деп хабарлады Ақорданың баспасөз қызметі.
П.Порошенко жоғары деңгейдегі кездесуді өзінің Астанада өткізуге ықыласты екенін растады. Ол сонымен қатар таяу уақытта «норманд төрттігінің» сыртқы істер министрлері мен Шығыс Украинадағы дағдарыс жөніндегі байланыс тобының кездесуі өтетінін, онда Қазақстанның елордасында талқыланатын құжаттың жобасы әзірленетінін атап өтті.
Әңгіме барысында Украина, Ресей, Германия және Франция көшбасшыларының Астанадағы кездесуін қаңтардың аяғында өткізу қарастырылып отырғаны айтылды.
Телефон арқылы сөйлесуге Украин жағы бастамашы болды, деп хабарлады баспасөз қызметінен.
