• Басты
  • «Астана Опера» театрының солисттері Елена Образцованың рухына бағышталған концертте шырқайды

«Астана Опера» театрының солисттері Елена Образцованың рухына бағышталған концертте шырқайды

15 Қаңтар, 2015 21:03
«Астана Опера» театрының меццо-сопрано дауыс иелері 18 қаңтарда Ұлттық Галерея сахнасында Елена Образцованың рухына бағышталған концертте шырқайды, деп театрдың баспасөз қызметі хабарлады.

«Астана Опера» театрының солисттері - Дина Хамзина, Салтанат Мұратбекова, Гүлжанат Сапақова, Татьяна Вицинская ұлы опера әншісінің репертуарынан туындылар орындайды. Сондай-ақ кештің ажарын сопрано дауысты Салтанат Ахметова мен Айгүл Ниязова ашады.

Концерт «Астана Опера» театрының музыкалық жетекшісі Абзал Мұхитдиновтің бастамасымен өткелі тұр. «Аталған жоба – күні кеше дүниеден озған заманымыздың ұлы әншісі Елена Василийқызы Образцованың рухына бағышталады. Аса көрнекті опера жұлдызы, тамаша ұстаз, КСРО Халық әртісі, Социалистік Еңбек Ері, Ленин сыйлығының иегері, көңілі сондай ашық-жарқын адамның мезгілсіз қайтыс болуына барлығымыздың қабырғамыз қайысты», - дейді маэстро.

Жақында ресейлік «Большая опера» жобасында жеңіске жеткен «Астана Опера» солисті Салтанат Ахметоваға, опера өнерінің тарихына есімі мәңгіге алтын әріптермен жазылған ұлы шебермен жүздесудің сәті түсті. Ол атап өткендей: «Елена Василийқызы сияқты адамдар – саусақпен санарлық. Оның өзін-өзі ұстай алатындығына үлкен құрметпен қарайсың. Конкурс барысында күн сайын бірнеше сағат бойы отырып, бізді тыңдау өте қиын. Соңғы сәтке дейін ол мазасы болмай тұрғанын қарасымен де, қимылымен де білдірмеген ұлы әртіс болып қала берді. Осындай қасиетті сіңіріп, бойыңа сондай қажырлық жинағың келеді. Ол сайысқа түскендердің барлығына шуағын төкті. Ал конкурсқа қатысушыларды сынаған кезде, тағы махаббаты мен құрметін білдіріп, қолдап отырды».  

Естеріңізге сала кетейік, Елена Образцова Астанада бірнеше рет болды. 2013 жылдың қазанында ол  «Астана Опера» театрының әлемдік тұсаукесеріне орай өткен гала концертте шырқады. 

Барлық жаңалықтар