• Басты
  • «Жеңіс вымпелі» Астанаға келді (ФОТО)

«Жеңіс вымпелі» Астанаға келді (ФОТО)

15 Қаңтар, 2015 15:33
үгін Астана қаласындағы Генерал С.Нұрмағамбетов атындағы «Жас ұлан» республикалық мектебінде «Жеңіс вымпелі» атты әскери патриоттық акция-марафоны ресми түрде аяқталып, вымпел аталған мектептің мұражайына табысталды, деп хабарлайды Қорғаныс министрлігі.

Бүгінгі салтанатты шараға ҚР Қорғаныс министрінің орынбасары Талғат Мұхтаров, Ұлы Отан соғысының ардагерлері жиналды. Сонымен қатар, Генерал С.Нұрмағамбетов атындағы «Жас ұлан» республикалық мектебінің оқушылары әскери сап түзеді.

Ең алдымен Қорғаныс министрінің орынбасары Талғат Мұхтаров жиналғандарды Ұлы отан соғысының 70 жылдығымен құттықтап, ардагерлерге өз тілегін жолдады. Сондай-ақ, осы акцияның маңыздылығын атап өтті. Одан кейін «Жеңіс вымпелін» «Жас ұлан» мектебінің 11 сынып оқушысы, оқу озаты, спорт шебері Ақтөре Есентаев мектеп мұражайына табыстау құрметіне ие болды.

"Қазақстаннан Ұлы отан соғысына 12 атқыштар дивизиясы, 4 кавалерия дивизиясы, 7 бригадасы, 50 жеке полк батальондары қатысты. Совет Армиясының жауынгерлік туының астына 1 ¬млн. 300 мың қазақстандық сапқа тұрды. Оның 850900-і қаракөз қазақтар еді. Соғыс жылдарында 500 қазақстандық Кеңес Одағының Батыры атағына ие болды. 4 даңқты жерлесіміз бұл атақты екі мәрте иеленді. Осындай батырларымызды келешекке ұрпаққа үлгі ету үшін Жоғарғы Бас қолбасшымыз, Елбасы Нұрсұлтан Назарбаевтың бастамасымен барлық гарнизондарымызда «Жеңіс вымпелі» акция-марафоны ұйымдастырдық. Қазақстанның барлық өңірінде жалғасын тапқан бұл шараның жастарды патриоттық рухта тәрбиелеуде маңызы зор", - дейді Қазақстан Қарулы Күштері Құрлық әскерлерінің бас қолбасшысы Мұрат Майкеев.

Бұл патриоттық акция-марафон ең алдымен 30 желтоқсанда Шығыс әскери округынан бастау алған болатын. Одан кейін Қарағанды, Семей, Қапшағай, Ақтау, Алматы қалаларының әскери гарнизондарында өткізілді. Ұлы Жеңістің 70 жылдығы құрметіне орай ұйымдастырылған шараның мақсаты – батырларымыздың ерен еңбегін жас ұрпақтың бойына сіңіру болып табылады.

Барлық жаңалықтар