Павлодарда Ұлы Жеңістің 70 жылдығына арналған іс-шаралар басталды

15 Қаңтар, 2015 15:18

Павлодар облысында Ұлы Жеңістің 70 жылдығына арналған іс-шаралар бастау алды, деп хабарлады облыс әкімдігінен.

Достық үйінде Кеңес Одағының Батыры Махмет Қайырбайұлы Қайырбаевтың туғанына 90 жыл толуына арналған мерейтойлық кеш өтті. Батырды еске алу кешіне Ұлы Отан соғысы және еңбек ардагерлері, үзеңгілес әріптестері, замандас-ардагерлер, жастар бірлестіктерінің мүшелері, батырдың зайыбы Сәбира Әмірқызы, балалары мен туған-туыстары жиналды.

«Махмет Қайырбаев - Белорусь пен Балтық елдерінде майданға қатысқан жауынгер. Ағамызға ерекше ерлігі үшін «Кеңес Одағының Батыры» атағы берілді. Осы кезде ол 20 жаста ғана болатын», - деді аймақ басшысы Қанат Бозымбаев.

Сонымен қатар ол Махмет Қайырбаевтың өңірдің дауына қосқан үлесін жоғары бағалады.

Айта кетерлік жайт, Махмет Қайырбайұлы Қайырбаев (1 қаңтар 1925 жыл – 12 шілде 1996 жыл) – Совет Одағының Батыры, Бірінші Балтық майданындағы 2-ші гвардиялық әскердің 17-танкіге қарсы ататын артиллериялық жеке бригаданың командирі, аға лейтенант (отставкадағы полковник).

Кеңес әскері қатарындағы қызметінен кейін ҚазСРО-да түрлі жауапты басшылық лауазымдарды иеленді.

Павлодар қаласының құрметті азаматы ретінде облыс орталығындағы көшелердің біріне оның аты берілген. Өзі еңбек еткен бұрынғы облыстық атқарушы комитеті ғимаратының алдына мемориалды тақта қойылып, Жеңіс саябағындағы Батырлар аллеясына мүсіні орнатылған.

Қазіргі уақытта М.Қ. Қайырбаев батареясының әскери зеңбірегі облыстық тарихи-өлкетану музейіне экспонат ретінде қойылған.