ҚР Бас прокуроры азаматтарды жеке мәселелері бойынша қабылдады
15 Қаңтар, 2015 11:18
Бас прокурор Асхат Дауылбаев кезекті рет азаматтарды жеке қабылдады. Арыз берушілердің өтініштері негізінен қылмыстық және әкімшілік істер бойынша сот актілеріне, қылмыстық іс жүргізудің сотқа дейінгі сатысындағы уәкілетті органдардың шешімдеріне, сондай-ақ әлеуметтік-экономикалық саладағы шағымдарға қатысты болды, деп хабарлады Бас прокуратураның баспасөз қызметі.
«Бас прокурор келген азаматтарды тыңдаған соң шағымдарды мұқият зерделеп, заң бұзушылық анықталған жағдайда бұзылған құқықтарды қалпына келтіру және кінәлі тұлғаларды заңмен белгіленген жауапкершілікке тарту бойынша түбегейлі шаралар қабылдауды тапсырды», - делінген хабарламада.
Аталып өткендей, Бас прокурордың осыған дейінгі қабылдауында болған арызданушылардың дәйектерін тексеру үшін Бас прокуратура қылмыстық қудалау органдары қаулыларының күшін жойып, сотқа дейінгі тергеу қозғады.
