2014 жылы Ақмола облысында ЖҚЖК-2020 бағдарламасына 3 мың адам тартылды

2404 адам тұрақты жұмыспен қамтылды. Бұл Ақмола облысы әкімдігі мен Денсаулық сақтау және әлеуметтік даму министрлігі арасында қол қойылған республикалық бюджетте қарастырылған мақсатты трансферт нәтижелері туралы келісімде көрсетілген көрсеткішпен салыстырғанда 21,1%-ға артық.

Хабарламада айтылғандай, 2014 жылға арналған республикалық бюджет бағдарламасы шараларын қаржыландыру көлемі 4,3 млрд теңгені құрайды.

Денсаулық сақтау, білім беру, әлеуметтік көмек, құрылыс пен ТКШ саласындағы 71 инфрақұрылымдық шараларды іске асыру аясында 871 адам жұмыспен қамтылған.

Қолда бар мәлімет бойынша, 468 адам 1,136 млрд теңге несиені өз кәсіптерін ашу мен оларды кеңейту мақсатында алып отыр. Соның ішінде 392-сі бастауыш кәсіпкерлерге берілген. 222 адам кәсіпкерлік негіздерін оқып шықты.

Үшінші бағыт аясында 484 адам кәсіптік оқытылды. Оқыту шаралары 16 білім беру ұйымдарында жүзеге асырылады. Ал жастардың өндірістік тәжірибесіне 777 адам тартылды. Әлеуметтік жұмыс орындарына 456 жұмыс берушімен келісімшарттар құрылып, 1119 адам бағытталды. Статистка органдарының мәліметіне сүйенсек, үшінші маусым қорытындысы бойынша облыстағы жұмыссыздық деңгейі 5,0% құрап, жастар жұмыссыздығы 4,1% шамасында болған.

2015 жылы «Жұмыспен қамтудың жол картасы-2020» бағдарламасын ары қарай іске асыру мақсатында республикалық бюджеттен 4,3 млрд теңге көлемінде қаражат бөлу жоспарланған.