Белоруссияны азат еткен қазақстандық жауынгерлердің туыстарына мерейтойлық медальдар табыс етілді

Ведомсвтоның мәліметі бойынша, Ұлы Жеңістің 70 жылдығына арналған мерейтойлық медальдерді тапсыру салтанатына ержүрек жауынгер Ихсанбек Асановтың қызы Фарбиза Асанова мен немересі Нұрлан Орманбетов қатысты. Витебск облысы Дубровно қаласын жаудан азат етуде ерлікпен қаза тапқан батырдың немересі тағдырын әскермен байланыстырған. Бүгінде ол ҚР ҚК Әуе қорғанысы күштерінің бас қолбасшысы.

«Менің әкем өте ержүрек адам болған. Ол үшін намыс бәрінен қымбат. Бала күнімде мен әкемнің өмірге белсенді құштарлығына таң қалатынмын. Оның махаббаты мен қамқорлығы ер азаматтардың өз балалары мен жақындарына үлгі болып қалады», - дейді Ф. Асанова.

2014 жылы көктемде қайтыс болған Болташ Сейітовтің наградасы ұлы Талғат Сейітовке табыс етілді.

«Менің әкем соғыстың басынан аяғына дейін қатысты. Белоруссияны, Украинаны және Молдавияны азат етті. Ол қашанда алғы шепте ажалмен қатар жүрді. Соғыстың барлық отынан өткен ол парасатты, өмірді сүйген адам боп қалды», - дейді Т. Сейітов.

Ұлы Жеңістің 70 жылдығымен құттықтаған Беларусь Республикасының Елшісі Анатолий Ничкасов фашист басқыншыларына қарсы тұруда бір жағадан бас, бір жеңнен қол шығара білген барлық ұлт өкілдерінің бірлігі гитлер армиясын күйрете білді деп атап өтті.