Ақтөбеде шағын тракторларды шығару ісі қолға алынды

«Компания «Уралец» шағын тракторларын шығарады. Бұл марканың нарықта жүргеніне 20 жыл уақытқа жуықтапты. Бұл өнімге деген сұраныс бар, фермерлер үшін оның бағасы да тиімді - 1 млн. теңгеге дейін ғана. Кәсіпорын жылына 500 «Уралец» пен өзге де техника шығаруды көздеп отыр», - делінген хабарламада.

Айта кетерлік жайт, жаңа жыл алдында өткен көрмеге қойылған алғашқы төрт трактор Алматы, Ақсай (БҚО), Ақтөбе және Алғаға сатылып жөнелтілді. Жалпы, өндірушілер өз өнімін еліміздің барлық аймақтарында саудаламақшы.

«Ресейлік әріптестер шағын трактор құрастыру үшін жиынтықтаушы бөлшектерді жеткізеді. Біздің техника агроөнеркәсіптік кешен, коммуналдық шаруашылық салалары және жол жөндеу жұмыстарына арналған, олар жұмыстың 50 түрін атқара алатын болады, - деді «Трактор» МТС» ЖШС директоры Сабыржан Бегімбаев.

ІСБ-дан атап өткендей, жоба облыс әкімдігі мен аймақтық Кәсіпкерлер палатасының үлкен қызығушылығын тудырды, сондықтан олар жобаны жүзеге асыруда барынша қолдау көрсетеміз деп уәде берді.