• Басты
  • Жеңіс жалауы Қапшағай гарнизонына жетті (ФОТО)

Жеңіс жалауы Қапшағай гарнизонына жетті (ФОТО)

9 Қаңтар, 2015 09:31
Қапшағайдағы Мәдениет үйінде «Жеңіс жалау» марафон-акциясына қатысушылар Семей гарнизонынан келген Жеңіс жалауын тапсыру салтанатының куәгері болды, деп хабарлайды Қорғаныс министрлігі.

Салтанатты шараны ашқан Қапшағай гарнизонының бастығы подполковник Мақсұт Гусейнов Ұлы Жеңістің 70 жылдығы мен Елбасы – Жоғарғы Бас қолбасшы Н.Ә. Назарбаевтың бастамасымен жарияланған Ардагерлер жылын мерекелеу аясындағы акцияның маңызын ерекше атап өтті.

Ол «Жеңіс вымпелін қабылдап алу біз үшін үлкен құрмет. Екінші дүниежүзілік соғыстағы жауынгерлердің ерлігі әскери қызметшілер үшін Отан алдындағы борышын өтеуде әрқашан үлгі болып қала бермек» деді. Ол, сондай-ақ, биылғы жылдың әскерлерде «Біздің жетістіктеріміз – Ұлы Жеңіске» ұранымен өтіп жатқанын атап өтті.

Шараға қатысушылар алдында «Ардагерлер ұйымдары» республикалық қоғамдық бірлестігі Қапшағай қалалық филиалының төрағасы Сергей Вижунов та сөз алды. Ол Мемлекет басшысының қамқорлығының арқасында бірде-бір Ұлы Отан соғысының ардагері, еңбек майданының ардагері, сондай-ақ соғыс балалары назардан тыс қалмайтынын атап өтті.

Ол «Бұл сияқты шараларға қан майданды басынан кешкен ардагерлер ғана емес бүгінде әскер қатарында қызмет ететін Отан қорғаушылары да селқос қарай алмайды» деді.

Ертең Қапшағай гарнизонының әскери қызметшілері Жеңіс вымпелін Отар 40-шы әскери базасына жөнелтеді.

«Жеңіске құрмет» акциясы шеңберінде елімізде шоғырланған әскери бөлімдерге Жеңіс вымпелін тапсыру эстафетасы жүруде.

15 қаңтарда Жеңіс вымпелі Кеңес Одағының Батыры, Халық Қаһарманы армия генералы Сағадат Нұрмағамбетов атындағы «Жас ұлан» республикалық мектебіне тапсырылатын болады.

Барлық жаңалықтар