Екібастұз СЭС-1 қуаттылығы қайта құру жұмыстарынан кейін 3500 МВт-қа жетті
6 Қаңтар, 2015 19:34
Энергоблок іске қосылғаннан кейін Екібастұз СЭС-1-дің қуаттылығы 3500 МВт-қа жетті, бұл өз кезегінде Қазақстанның бірыңғай энергетикалық жүйесіндегі электр энергиямен қамтамасыз ету сенімділігін нығайтады, деп хабарлады Павлодар облысының ішкі саясат басқармасы.
Желіге қуаттылығы 500 МВт №2 энергоблок қосылды. Осылайша ҮИИД МБ мен Индустрияландыру картасы аясында № 2 энергоблок бойынша қайта құру жұмыстары аяқталуда.
Басқармадан атап өткендей, Екібастұз СЭС-1 №2 энергоблогын қайта құру бағдарламасына қазандық пен турбина құралдарын қалпына келтіру, электр және автоматты бақылау бойынша құралдарды орнату, сонымен қатар «Альстом Пауэр Ставан» ЖАҚ өнірісінің электрфильтрін іске қосу жұмыстары енгізілді. Жоба құны 61,5 млрд теңге.
Жұмыстар 2011 жылы 10 мердігер компанияның қатысуымен басталған болатын. Ол өз кезегінде уақытша 500 жұмыс орнын ашуға және станция іске қосылғаннан кейін 25 адамды тұрақты жұмысқа алуға мүмкіндік берді.
