• Басты
  • Қарағанды облысында ауыл жастары үшін колледж ашылды

Қарағанды облысында ауыл жастары үшін колледж ашылды

19 Желтоқсан, 2014 16:48
Қарағанды облысының Киевка ауылында 200 студентке есептелген Нұра көпсалалы колледжі ашылды, деп хабарлады облыс әкімдігі.

Колледж 200 білімгерге есептелген. Онда 100 орынға арналған жатақхана, асхана, медициналық пункт бар. Физика, химия, биология, информатика пәндері бойынша оқу кабинеттері, шеберлік үйірмелері мен аспаздық зертханасы қажетті құралдармен жабдықталған.

Әкімдіктен атап өткендей, мамандарды даярлау «Аспазшы», «Тракторист-машинист», «Дәнекерлеуші-жөндеуші», «Фермерлік шаруашылық», «Құрылыс», «Техникалық қызмет көрсету, жөндеу және автомобиль көлігін пайдалану», «Тігін өнідірісі мен киім үлгісін жасау», «Іс жүргізу мен мұрағаттану» мамандықтары бойынша жүргізіледі.

Колледжде Нұра мен  Осакаров ауданының мектеп бітірушілері білім алатын болады. «Президент  Нұрсұлтан Назарбаев Қазақстан халқына Жолдауында экономиканы дамытумен қатар қоғамдағы білім деңгейін арттыру мәселесіне барынша көп көңіл бөлінеді деген болатын. Осы міндетті орындауда аталмыш көпсалалы колледж өз үлесін қосады деп есептеймін», - деп атап өтті облыс әкімі Нұрмұхамбет Әбдібеков.

Сонымен қатар ол, облыста халықаралық бакалавриат, дуальды білім беру, несиелік білім беру жүйесі сынды бірқатар жобалар табысты енгізіліп және облыстың білімгерлері республикалық және халықаралық деңгейде жоғары нәтиже көрсетіп жатқанын тілге тиек етті.  

Барлық жаңалықтар