19 Желтоқсан, 2014 13:04

Астанада Торғай ЖЭС салу жөніндегі меморандумға қол қойылды

Бүгін «Тау-Кен Самұрық» ұлттық тау-кен компаниясы» АҚ мен түріктің Eren Enerji Elektrik Üretim A.S. компаниясы Қазақстанда Торғай ЖЭС салу жобасы бойынша өзара түсіністік пен әріптестік туралы меморандумға қол қойды, деп хабарлады «Самұрық-Қазына» АҚ.

«Жоба Қазақстан Республикасының отын-энергетика кешенін 2030 жылға дейін дамыту Тұжырымдамасы аясында Мемлекет басшысының инфрақұрылымдық түйткілдерді шешу тапсырмасы шеңберінде жүзеге асырылып жатыр», - делінген хабарламада.

Меморандумға «Eren Enerji» тарапынан директорлар Кеңесінің Төрағасы Ахмет Эрен мен «Sembol» компаниясының Басқарма Төрағасы Феттах Таминже, ал «Тау-Кен Самұрық» АҚ тарапынан Басқарма Төрағасы Мәжит Тұрмағамбетов қол қойды.

Аталған меморандум Қостанай облысындағы Құсмұрын көмір кен орнын игеру негізінде жылу электр станциясын салу жобасын жүзеге асыруды көздейді.

Қазіргі таңда Eren Enerji компаниясы жобаның алдын ала техникалық экономикалық негіздемесін әзірлеп жатыр.

Жобаны жүзеге асыру мақсатында «Тау-Кен Самұрық» АҚ мен «Eren Enerji» электр станциясын салатын және көмір кенішін игеретін бірлескен кәсіпорын құруды көздеп отыр.

Жобаны жүзеге асыру Қостанай мен Ақтөбе облыстарының электр желілеріне түскен жүктемені толық қамтамасыз етеді. Әрі Қазақстанның бірыңғай электр желісі жүйесінің сенімділігі мен тұрақтылығын арттыра түспек.

Барлық жаңалықтар