Непал әскерилері «Дала қыраны-2015» оқу-жаттығуына қатысады

19 Желтоқсан, 2014 15:32

Непал әскерилері ҚР ҚК бітімгершілік шартты дайындаудағы ынтымақтастыққа әзір екендіктерін білдіріп, қазақстандық тарап непал әскерилерін «Дала қыраны-2015» тактикалық-маманданған бітімгершілік оқу-жаттығуына қатысуға шақырды, деп хабарлайды Қорғаныс министрлігі.

«Непалға барған сапарында ҚР ҚК өкілдері Бирендр бітімгершілік орталығын құру тарихымен, оның мақсат-міндеттерімен, оқу бағдарламасымен танысты. ҚР ҚК және АҚШ ҚК арасындағы «Mil-to-mil» әскери келісімшарттар жоспары аясында ұйымдастырылып отырған шара қазақстандық құрлық және аэромобильдік әскері, «Бейбітшілік жолындағы ынтымақтастық» оқу-жаттығу орталығы мен «ҚАЗБРИГ» бітімгершілік бригадасы өкілдерінің қатысуымен өтті»,- делінген хабарламада.

Бирендр бітімгершілік орталығы бейбітшілікті сақтау, өңірлік және жаһандық қауіпсіздік бойынша БҰҰ-ның барлық операцияларына қатысып келе жатқан кәсіби бітімгерлерді дайындау бойынша мойындалан халықаралық орталық болып табылады.

Естеріңізге сала кетейік, мұндай тактикалық-маманданған «Дала қыраныі» бітімгершілік оқу-жаттығуы Қазақстан, Ұлыбритания, Солтүстік Ирландия мен АҚШ-тың Қарулы Күштері бөлімшелерінің қатысуымен 2003 жылдан бері жыл сайын өткізіледі.

Оқу-жаттығу барысында БҰҰ мен НАТО ұйымдастырған дағдарысты жағдайларда әрекет ету мен бейбітшілікті сақтау әдістері пысықталып, бітімгершілік операцияларына қатысу жолдарына машықтанады.

Биыл аталмыш дала оқу-жаттығуы алғаш рет Қазақстан мен Германия сыртында өткізілді.

Барлық жаңалықтар