Қазақстан заман көшіне ілесіп емес, оның алдында келеді - Президент

«Біз елдің тарихи дамуын түбегейлі өзгерттік. Еліміз қазіргі таңда заман көшіне еруі былай тұрсын, одан озып келе жатыр. Алдымен 2030 Стратегиясын жар салған еліміз енді 2050 Стратегиясына ұмтылып отыр. Жыл сайын еліміз өзінің жаңаша даму жолына түсуде. 2050 жылға дейінгі Қазақстанның даму Стратегиясы миллиондаған халықтың жолы. Бұл біздің ата-бабамыздың салған жолының заңды жалғасы. Тарихи датаға дейін енді 36 жыл қалды. 2050 жылы тәуелсіздік құрдастары елдің аға буын өкілдеріне айналады», - дейді Н.Назарбаев.

Алтай мен Атыраудың, Сырдария мен Есілдің арасындағы еліміздің жылнамасы алтын әріппен жазылған ардақты күн, деді ол. 

«Жер бетінде мыңдаған ұлыстар мен ұлттар бар, біз дербес мемлекет құру бақытына ие болған 193 ұлттың біріміз. Адам басына бақыттың қонуы бір бөлек, сол бақытты бағалай білудің жөні бір бөлек. Тәуелсіздік алған елдердің барлығында тұрақтылық пен татулық ұйып, дамудың даңғылына түсе қойған жоқ. Тәуелсіздік тарихтың сыйы немесе бүгінгінің меншігі емес, ол өткен бабалардың алдындағы қасиетті борыш, келешек ұрпақтың алдындағы зор жауапкершілігіміз. Біз тәуелсіздігімізді тәу етіп, тәуба етіп тәуекелмен болашаққа бет түзеп келе жатқан халықпыз», - деген Елбасы еліміздің тұмары, елдігіміздің шынары болған тәуелсіздік күнімен барша қазақстандықтарды құттықтады.

Камила Амирова