ҰҚШҰ Бас хатшысы ҚР Қорғаныс министрлігіне келді
12 Желтоқсан, 2014 09:48
ҚР Қорғаныс министрі Иманғали Тасмағамбетов Ұжымдық қауіпсіздік туралы шарт ұйымының Бас хатшысы Николай Бордюжамен кездесті, деп хабарлады Қорғаныс министрлігі.
«Кездесу барысында ҰҚШҰ жауапкершілігі аясындағы қауіпсіздікті қамтамасыз ету, әскери және саяси ынтымақтастықтың қазіргі және перспективалық мәселелері бойынша пікір алмасылды», - делінген хабарламада.
Қорғаныс министрі Ұжымдық жедел ден қою күштерін одан әрі дамытудың маңызын атап өтіп, ағымдағы жылғы тамыз айында Қазақстанда өткен «Өзара іс-қимыл – 2014» кешенді оқу-жаттығуына жоғары баға берді.
Тараптар, сондай-ақ, 2014 жылғы 23 желтоқсанда Мәскеуде өтетін Ұжымдық қауіпсіздік кеңесінің күн тәртібін талқылады.
Естеріңізге сала кетейік, Новороссийскте өтіп жатқан РФ ҚК әуе десанты әскерлері басшылық құрамының жедел жиынында ҰҚШҰ Біріккен штабы лауазымды адамдарының құрамында Қазақстан өкілдері де қатысуда.
