• Главная
  • Қазақстанда жыл сайын шамамен 3 мыңдай жазасын өтеуші диплом алады
11 декабря, 2014 13:04

Қазақстанда жыл сайын шамамен 3 мыңдай жазасын өтеуші диплом алады

Қазақстанда шамамен 50 шақты кәсіптік колледж жыл сайын 3 мыңға жуық жазасын өтеушіні 47 кәсіп түріне баулиды, деп мәлімдеді ҚР ІІМ Қылмыстық-атқару жүйесі комитеті төрағасының орынбасары Жанат Кешубаев ОКҚ брифингінде.
Қазақстанда жыл сайын шамамен 3 мыңдай жазасын өтеуші диплом  алады

«46 түзету мекемесінде еңбек нарығында сұранысқа ие 47 мамандық түрін оқытатын кәсіптік колледждер жұмыс істейді. Жыл сайын шамамен 3 мыңдай жазасын өтеуші осынау кәсіптік колледждерде мемлекеттік үлгіде белгіленген диплом алып шығады», - дейді.

Оның айтуынша, 2001 жылы Қазақстанда осы сиякты тек 4 колледж болса, қазіргі таңда кәсіптік колледждер саны 46-ға жетті.

«Әрине, аталмыш колледж қызметтерінде өз мәселелері де жоқ емес. Соның ішінде материалды-техникалық қамтылу деңгейі төмен. Онымен қоса оқулықтар тапшылығы да жоқ емес. Дегенмен біз жазасын өтеушілердің бостандыққа шыққанда белгілі бір кәсіп түрін меңгеріп шығуына мүмкіндік жасап жатырмыз», - дейді Ж.Кешубаев.

ҚР ІІМ Қылмыстық-атқару жүйесі комитетінің төраға орынбасарының айтуынша, сотталған азаматтардың жұмысқа тұруы бүгінгі күні өзекті болып тұр. Бұл мемлекеттің ғана емес, қоғамға да қатысты іс.

«Сотталғандардың жұмыспен қамтылуы бір ведомстваның құзіреті аясында шешіле салатын нәрсе емес. Мұнда мемлекеттің шындап кірісуі мен қоғамның да ат салысуы керек», - дейді

Индира Қауметова