Сенат Қазақстан мен ХҚДБ арасындағы қарыз туралы Келісімді ратификациялады

11 Желтоқсан, 2014 10:39

Сенат жалпы отырыста Қазақстан Республикасы «Қазақстан Республикасы мен Халықаралық Қайта Құру және Даму банкі арасындағы қарыз туралы (суландыру және сусіңгіш жүйені жетілдіру жобасының екінші фазасы) Келісімді ратификациялау туралы» Заң жобасын қабылдады.

Салалық комитеттің қорытындысында атап өткендей, суландыру және сусіңгіш жүйені жетілдіру жобасының екінші фазасы (бұдан кейін - ССЖЖ-2) трансшекаралық өзендердің (Сырдария, Шу, Талас пен Іле) бассейндерінде ауыл тұрғындарының әлеуметтік-экономикалық тұрмысын жақсартуға бағытталған.

«ССЖЖ-2 жүзеге асырудың есептік құны 339,5 млн долл, оның ішінде ХҚҚДБ 102,9 млн долл қарызға алынса, республикалық бюджеттен қосымша - 236,6 млн долл қаржыландыралады. Берешекті өтеу 2022 жылдан бастап 10 жылға созылады. Жобаны аяқтау 2021 жылдың 31 желтоқсанына жоспарланған және жеңілдік мерзімі белгіленген», - деп хабарлады ауыл шаруашылығы министрі Асылжан Мамытбеков.

ССЖЖ-2 Алматы, Жамбыл, Оңтүстік Қазақстан және Қызылорда облыстарындағы жалпы көлемі 113 мың га суармалы жерді қамтиды.

Келісім Қазақстан Республикасы Президентінің 2014 жылдың 17 сәуіріндегі №804 Жарлығымен мақұлданып, Қазақстан Республикасының Қаржы министрі Қазақстан Республикасы Үкіметі атынан 2014 жылдың 29 сәуірінде қол қойды.

Камила Амирова

Барлық жаңалықтар