• Главная
  • Заң түпнұсқасы мемлекеттік тілде қабылданбай, қазақ тілі кең қолданыс таппайды - Озғанбаев
10 декабря, 2014 11:48

Заң түпнұсқасы мемлекеттік тілде қабылданбай, қазақ тілі кең қолданыс таппайды - Озғанбаев

Заң түпнұсқасы мемлекеттік тілде қабылданбай, қазақ тілі кең қолданыс таппайды, деп мәлімдеді республикалық ардагерлер кеңесінің төрағасы, тарих ғылымдарының докторы, профессор Өмірзақ Озғанбаев Тәуелсіздік мерекесіне орай өткен «Мемлекеттілік және тіл» атты дөңгелек үстелде.
Заң түпнұсқасы мемлекеттік тілде қабылданбай, қазақ тілі кең қолданыс таппайды - Озғанбаев

«Тәуелсіздіктің жиырма үш жылында мемлекеттік тілдің мерейін өсіретін ауқымды шаралар қолға алынып, әлі де талай жұмыстар атқарылуда.Алысқа бармай-ақ кешегі Целиноград пен бүгінгі Астананы салыстырып қарайтын болсақ, айырмашылықтың жер мен көктей екенін көреміз. Осы тұрғыда қазақ тілді мектептер  санының артып келе жатқанын да айта кету керек. Бұдан бөлек қазақ тілді БАҚ пен мемлекеттік тілде сөйлейтін орта да қалыптасты. Мұның барлығы қалыптасқан мемлекетіміздің қалыптасқан тілін көрсетеді», - дейді профессор.

Сонымен қатар, Өмірзақ  Озғанбаев Елбасының Ұлытаудың баурайында берген сұхбатында кімнің қай мінберден мемлекеттік тілде сөйлеймін десе де ешкімнің қой демейтінін айтқанын еске салды.

«Қазіргі таңда басты нәрсе қазақ пен қазақтың ана тілдерінде сөйлеуі. Ал халық болып мемлекеттік тілде қолдау үшін жоғары жақтан нақты шаралар түріндегі қолдау керек. Парламентте қабылданатын халықаралық және мемлекеттік деңгейдегі заң жобалары мемлекеттік тілде қабылданбайынша, қазақ тілі дамып, халық арасында кеңінен қолданыс таппайды», - деп түйіндеді сөзін тарихшы.  

Айта кетейік, қазіргі таңда әлемде 95 мемлекеттік тіл бар. Жер бетіндегі 7 мыңнан астам тіл болса, қазақ тілі тұтыну деңгейі бойынша алғашқы 60 тілдің қатарына кіреді.

Бауыржан Мұқанов